六十六萬九的跑車

最近稍為有留意新聞的, 看完這篇留言之後, 很難不對此感到會心微笑, 忍俊不禁...

(原文在信報網站的一篇論壇留言)

各位朋友,我係文太,第一次響呢度留言,想呻下我個死佬d衰格野....

我同我老公結左婚12年,冇生細路.近來我老公話要用屋企d錢買車,係一架六十六萬九o既歐洲跑車.雖然我地家庭收入唔差,但六十幾萬都唔係小數目,所以我梗係要考慮清楚啦...

第一,我地都唔係成日出街,主要都係返老爺奶奶屋企,加上附近有地鐵站,所以其實架車都唔會成日用,我老公就猛咁話將來應該會成日揸車,但又講唔出實際理由....

第二,我問佢點解要買架咁貴o既跑車,買架普通日本車都係三十幾萬啫,慳番d錢可以做好多野(屋企好耐冇裝修過,電器又舊,我地又冇買醫療保險...),佢又猛咁話歐洲跑車比日本車好好多,但係好o係邊度,佢就講到一舊舊,我都唔係好明 (其實我都去攞左d日本車o既資料番黎,都做左d分析,點知佢望兩眼就算,仲話我婦孺之見)

第三,佢之前買親野都奉旨超支,好似幾年前果套高級音響,買左番黎之後,又話要加個機座,又話要換喇叭線,結果用多左好多錢.

而最關鍵o既係,我地屋企附近冇晒停車場位!最近o既停車場都要行十幾分鐘,所以表面上揸車返老爺奶奶屋企係快左好多,但其實計埋行去停車場o既時間,揸車其實同坐地鐵差唔多!我問我老公點解決,佢竟然話買左架車先至慢慢諗,叫我信佢喎!未解決車位又點可以買車呀,大佬!

其實佢認認真真同我講要買車都係呢一兩個月o既事,我問多兩句都好合理啊!佢都唔記得我地當初結婚果時佢話會審慎理財,又話會尊重我意見,佢又唔記得其實每月d家用我係佔六成....

仲有一樣最衰格o既,就係佢成日用"一家之主"黎"撻"我...大佬,而家咩野年代啊,人人都講男女平等啦! 我前幾日同佢鬧交,佢話"全家得你一個反對喳,阻住地球轉",我話"全家得我同你喳噃",佢就話"老爺奶奶都贊成買跑車"....頂佢個肺,你老豆老母次次都企響你果邊架啦 (除左零三年果次,我響佢d親戚面前發難,之後佢老母良心發現,撐我).次次鬧交就拎老豆老母出黎,次次鬧交都話得我一個反對,你講晒啦!屈機!

點知尋日俾我偷聽到佢同朋友講電話,原來其實係佢老母想佢買車,車佢老母去街,又話其他兄弟姊妹都有靚車,佢冇車好寒酸,我老公仲話揸跑車先至有型喎....

頭家我都有份架,係唔係想洗晒d錢,臨老過唔到世?!

(按: 最慘情仲係, 駛左六十六萬九, 買左先知係左砌右砌的國產"山寨"車咋, 仲要老爺奶奶屋企樓下係就係有車位, 不過無自動閘口架, 次次停低仲要落車等半粒鐘登記檢查先上到樓! 搭地鐵o都card直入一定快過佢)